तालमेल - हाम्रो र उसको

तालमेल- हाम्रो र उसको

भुपेन्द्र आचार्य

 

( म भन्दछु )

म चैँ छु यता, हामी छौँ यता, तर ऊ अन्तै छ

म भन्छु एक, ऊ भन्छ अर्कै, ऊ आफ्नै धुन्‌मा छ ।

तर नि हामी, सबैमा ऊ छ, भन्दछ समाज

हामी छौँ पूर्व, पश्चिम ऊ छ, मिलेन तालमेल ॥

राज्नीति नै हो, नीतिको राजा, ऊ भन्न खोजेको

नीति राजमा, नेपाली पारा, किन हो घुसाको ? 

यता नि त्यै छ, उता नि त्यै छ, जता नि त्यही छ

तर नि किन ? किन हो किन ? मिलेन तालमेल ॥

( विद्यार्थी भन्दछन् )

जता नि थियो, ठिकै त थियो, किन हो क्याम्पसमा ?

विशुद्ध शिक्षा, बनाउन बाबा ! नल्याउन यसमा ।

सकिन्न कोर्स, हुँदैन एक्जाम, प्रायः यस्तै छ

नेता र हामी, सकेनौं मिल्न, मिलेन तालमेल ॥

नभित्र्याउ ऊलाई, शिक्षामा भन्दा, मानेनौ तिमीले

भन्देउ न हाम्ले, भाइस चान्सलर, पाउँने हो कहिले ?

शिक्षामा राम्रो, बनाउन नीति, तिम्रो हो त्यै काम

सोझ्याउन थाले, आआफ्नो दुनो, मिलेन तालमेल ॥

(जनता भन्दछन् )

थाल्यौ नि तिम्ले, राजनीति भन्दै, छल र कपट

जाल र झेल, खुट्टा नै तान्ने, फोहोरी त्यो खेल ।

नीतिको राजा, रहेछ त्यसको, शब्दको अऽर्थ

बनायौ तिम्ले, उल्टो नै अर्थ, भएन तालमेल ॥

लिदीमा भिषण, पहिरो गयो, घरबार बचेनन्

राहत बाड्दा, राजनीति भयो, पीडितले पाएनन् ।

आकाशमा उडे, हेलीकप्टर, नेताज्यूहरूका

जनता भोकै, पाल् मुनी बसे, मिलेन तालमेल ॥

कोरोनापनि, बढेको बढ्यै, आजकाल आएर

बल्ल र तल्ल, पीसीऽऽर भयो, ऽऽरडीटी भुलेर ।

भन्दछौँ हामी, सरकारलाई, परिक्षण बढाउन

सरकार भन्छ, आवश्यक छैन, मिलेन तालमेल ॥

( फेरी म नै भन्दछु )

त्यसैले हामी, आ-आफ्नो ठाउँमा, बनौँ है इमानदार

आ-आफ्नो काम, रामरी गरौँ, बनौं है जिम्मेवार ।

कायम गरौँ, सबैले दुरी, मास्क नै लगाऔँ

घरमै बसौँ, घरमै खेलौँ/पढौँ, तालमेल मिलाऔँ ॥

सर कारको, मात्र नै मुख, नताकी बसौँ है

सबै जनाले, थोरै भएनी तरकारी, खाऔँ है ।

किनेर होइन, आफ्नै बारीको, सबैले खाऔँ है

यस्तै नै गरी, आफैले बुझी, तालमेल मिलाऔँ है ॥

ऽ - अ

ऽऽ - आ